 |
 |
|
|
" سيزين اؤلکه ده ائششک يوخدورمو؟ " يازان : عزيز نسين ديشي آغرييير کيمي، بير الي اوزونده باشيني ساغا-سولا يئلله ده-يئلله ده ايچري گيردي. بير ياندان اليني ياناغينا وورور، بير ياندان دا: - توفف، روسوايي-جاهان اولدوق...- دئيه دئيينيردي. او، اصلينده چوخ نجيب بير آدامدير. قاپيدان گيرر-گيرمز، سالام وئرمه دن بئله دئيينمه سينه چوخ تعجوب ائتديم. - خوش گلدينيز، - دئديم - بويورون، ريجا ائديرم اوتورون. - رذيل اولدوق، رذيل… - نئجه سينيز؟ - نئجه اولا بيلرم؟ بي آبير اولدوق… بي آبير… يقين باشينا بير فلاکت گلميشدي. بلکه ده عاييله سينه بير بدبختليک اوز وئرميشدي... - يئرين ديبينه گيرديک، محو اولدوق... - آخي نه اوچون؟ نه اولموشدور؟ - داها نه اولاجاق. بير قوتور ائششگي کيشييه ايکي مين بئش يوز ليره يه ساتديلار... اوزونه ديقتله باخديم: يوخسا دلي اولموشدو؟ قورخومو گيزلتمک ايستمه ديم. آروادي چاغيرماق اوچون بهانه ائده رک: - قهوه ايچرسينيزمي؟ - دئديم. - قهوه-زاد يئري دئييل. روسواي اولدوق… بير نالسيز قارت ائششک ايکي مين بئش يوز ليره يه وئريلر؟ - هئچ ائششک ساتماديغيم اوچون بو قييمتين آرتيق-اسکيک اولدوغونو دئيه بيلمرم. - جانيم، من ده ائششک چووداري دئييلم. آما بير ائششگين ايکي مين بئش يوزه گئتمه ديگيني بيليرم. - دئيه سن عصبلرينيز پوزولموشدور؟ - پوزولار دا… منيم عصبيم پوزولماسين کيمينکي پوزولسون؟ سيز ائششگين بو قدر باها ساتيلديغيني گؤرموسونوزمو؟ - ايييرمي ايلدن چوخ اولار کي، هئچ ائششک گؤرمه ميشم. - من سيزه ائششگي گؤروب-گؤرمه ديگينيزي يوخ، اونون بئله مبلغه ساتيلديغيني دئييرم. - واللاهي نه دئييم… لياقتلي ائششک بلکه او قييمته گئده... - جانيم ائششک - ائششکدير. نه لياقتبازليقدير. او، دوروب نيطق سؤيله مه يه جک کي؟ اوسته ليک هم قوتور، هم ده قارت… ائله باها قييمته ساتديلار. هم ده ايشين ان پيس جهتي اودور کي، بوندا منيم ده ايشتيراکيم وار. - نه دئييرسن؟ - بلي. ائله من سنه بونو دئمک اوچون گلميشم. سن يقين بيليرسن کي، آمئريکانين دعوتي اوزره من ايستانبول اونيوئرسيتئتيندن بير ايللييه اورايا اعزام ائديلميش و خانيميمي دا اؤزومله آپارميشديم. - اونو بيليرم. - آمئريکادا بير پروفئسسورلا دوست اولدوم. منه چوخ کؤمک ائتدي. چوخ ياخشيليغي کئچدي. قاييديب گلندن سونرا اونونلا مکتوبلاشديق. او، تورکييه ني سئون، تورکلره دوست اولان بير آدامدير. مکتوبلاري نين بيرينده آنتيک خالي موتخصيصي اولان بير دوستونون اؤز اثري اوچون تدقيقات آپارماق مقصديله تورکييه گله جگيني يازيب اونا کؤمک ائديب-ائده بيلميه جگيني سوروشوردو. من ده تعطيل واختيندا بورايا گلرسه، ممنوعنيتله اونا يولداشليق ائده جگيمي يازديم. هينديستان و ايراندا تدقيقات آپاراندان سونرا او، اييول آييندا گليب چيخدي. او دوشدويو اوتئلدن منه تئلئفون ائتدي، من ده اونون يانينا گئتديم. او، اصلا آلمانييالي اولان آمئريکان ايدي. دئيه سن يهودي ايدي. بورا گلمه ميشدن اول گزديگي يئرلردن دؤرد بؤيوک چامادان دولوسو خالي، هئيبه و کيليم گتيرميشدي. او، چامادانلاريني آچيب بوراداکي شئيلري منه گؤستردي. او، بو شئيلري تاپماسيندان چوخ ممنون حالدا بونلارين اؤلچولمز درجه ده قييمتلي اولدوغونو سؤيله دي. بو شئيلرين آراسيندا اوچ قاريش ائني، بئش-اون قاريش اوزونو اولان کؤهنه خالي پارچاسيني گؤستره رک اونون آزي اوتوز مين دوللار قييمتي اولدوغونو، بير ايرانلي کندليدن جمعيسي بير دوللارا ساتين آلديغيني و بو زامان همين کندلي نين پولو آلارکن خئيلي تعجوب ائتديگيني دئدي. من بو خالي پارچاسي نين ندن بو قدر باها اولدوغونو سوروشدوم. «چونکي - دئدي، - بونون هر کوادرات سانتيمئترينده سکسن ايلمک وار. بو بير شاه اثردير». او، بؤيوک ائهتيراسلا بو مسله حاقيندا دانيشير و دونيادا بير کوادرات سانتيمئترده يوز ايلمک اولان خالي نين مؤوجود اولماسي، دونيانين هانسي موزه ينده ايسه آسيلماسي حاقدا دا دئييردي... سونرا منه بير کئچه گؤستردي. «بونو - دئدي - اللي سئنته آلديم. بونون ايسه آزي بئش مين دوللار قييمتي وار». من اوندان بئله باهالي شئيلري نه يوللا بو قدر اوجوز آلا بيلديگيني سوروشدوم. - قيرخ ايلدير کي، بو ساحه ده چاليشيرام، - دئدي. - بيزيم ده اؤزوموزه گؤره اوصولوموز وار. او سونرا منه بو اوصوللار حاقيندا معلومات وئردي. آغزيم آچيلا قالدي. خاليچيليق صنعتي، دونيانين ان يوکسک صنعتييميش. او خالي حاقيندا ايکي آلبوم، اوچ کيتاب نشر ائتديريب. دونيادا اولان بير نئچه قييمتلي خالي کوللئکسيياسي نين بيرينه ده اونون اؤزو صاحیبميش. بيز سونرا اونونلا آنادولونو گزمه يه چيخديق. ويلايتلري، قزالاري گزيرديک. او، مسجيدلرده قييمتلي حساب ائتديگي خاليلارين رنگلي فوتولاريني چکير، قئيدلر ائديردي. بير نئچه آدامدان کؤهنه هئيبه، خالي، کئچه و کيليم ده ساتين آلدي. دئديگينه گؤره بورادا آلديقلاري باشقا شرق اؤلکه لرينده آلديغي شئيلرين هاميسيندان قييمتلي ايميش. آرخئولوژي قازينتيلار آپاريلان بير يئره ده گلديک. آمئريکا و آلمان آرخئولوقلاري بير-بيريندن بئش-اون کيلومئتر آرالي دوشرگه لر قورموش، قازينتي ايشلري آپاريرديلار. اونلار يئرين آلتيني اوستونه چئويرميش، داغلاري، تپه لري حللاج پامبيغي حالينا سالميشديلار. بير قصبه گئنيشليگي اولان بو قازينتي اراضيسينده ائراميزدان اون عصر اولدن باشلاميش، بو گونه قدر بير نئچه مدنيت يارانيبميش و تورپاغين آلتيندا اوست-اوسته قاليبلارميش. اونلار يئرين آلتيندا بير نئچه شهر کشف ائتميش، اورادا سارايلار، قبيرلر تاپميشديلار. تاريخ و آرخئولوگييا ايله ماراقلانان چوخلو خاريجي توريست ماشيني دا بورادا قايناشيردي. هر ايکي-اوچ کيلومئترده بئش-اون توريسته راست گلمک اولوردو. اطرافداکي کندلرين ساکينلري بورايا توپلاشير، يئر آلتيندان تاپديقلاري ساخسي پارچالاريني بو توريستلره ساتير، توريستلر بو شئيلري قاپيشديريرديلار. کندلي اوشاقلاري دا يول بويونا دوزوله رک قازينتي يئريندن تاپديقلاري حالقالاري، يازيلي داشلاري، قاب-قاجاق قيريقلاريني «وان دالير»، «توو دالير»- دئيه باغيرا-باغيرا توريستلرين دالينجا قاچيرديلار. بورالارا قدر گليب چيخديغيم اوچون من ده ياديگار بير شئي آليم - دئديم. اون ياشي آنجاق اولان بير قيزين الينده بير وازو قولپو، يانينداکي اوغلانين الينده ايسه آدام باشينا اوخشايان ماوي رنگلي کيچيک بير داش واردي. بو يقين اوزوک داشي ايدي. - بونلار نئچه دير، بالا؟ - دئيه سوروشدوم. قيز وازونون قولپو اوچون قيرخ ليره، اوغلان ايسه داش اوچون اون بئش ليره ايسته دي. بو شئيلرين همين مبلغه دييب-ديمه ديگيني بيلمه ديگيمه باخماياراق: - باهادير، - دئديم. اونلار بؤيوک آداملار کيمي بو شئيلرين هئچ ده باها اولماديغيني، آتالاري نين بو شئيلري بئش مئتر درينليکده تاپديغيني دئديلر. بو شئيلري آلماق ايسته ييرديم کي، آمئريکالي موتخصيص اونلارين هئچ بير تاريخ و آرخئولوژي ديري اولماديغيني، شرق اؤلکه لرينده کندليلرين آوروپا و آمئريکادان گلن توريستلري آلداديب بئله شئيلري ساتديقلاريني سؤيله دي. اونون دئديگينه گؤره بو حيله گر کندليلر مشهور آرخئولوقلاري بئله آلداتماغي باجاريرلار. حتّی بير دفعه اؤلو بير ايت لئشي نين توکلريني قيرخاراق اونو بير حؤکمدارين موميياسي آدي ايله آمئريکالي توريسته ساتا بيلميشلر. بيز کيراله ديگيميز جيپ ماشينيندا گئديرديک. هاوا چوخ بورکو ايدي. يول کناريندا اوچ قوواق آغاجي آلتينداکي قويونو گؤرنده دايانديق. کؤلگه ده اوتوروب ناهار ائتمک ايسته ييرديک. اورادا بير کندلي اوزانميشدي. اونون ياخينليغيندا ايسه بير ائششک اوتلاييردي. بيز قوجا ايله سالاملاشديق و اونونلا دانيشماغا باشلاديق. من اونون دئديکلريني آمئريکالي اوچون اينگيليسجه يه چئويرديم. - بوراداکي کندلرده ان چوخ نه يئتيشير؟ کندلي: - هئچ بير شئي - دئيه جاواب وئردي. - اوللر بورادا اکين-بيچينله مشغول اولارديلار، تاخيل يئتيشردي. آما بو قازينتيلار باشلايالي 20 ايلدير کي، هامي تنبلله شيب، داها هئچ بير شئي اکميرلر. آمئريکالي: - عئينن باشقا يئرلرده ده بئله دير، - دئدي. - بس بو يئرلرين آداملاري نه ايله کئچينيرلر؟ - دئيه سوروشدوم. - يئرين آلتيندان قاب-قاجاق قيريغي، داش-ماش چيخارديب بورا دولوشان اجنبيلره ساتيرلار. آمئريکالي: - عئينن باشقا يئرلرده اولدوغو کيمي، - دئيه تکرار ائتدي. - بيزيم بو يئرلرين آداملاري يامان خاراب اولوبلار. اؤلکه نين بوتون خزينه لريني سو قييمتينه اجنبيلره ساتديلار. يئردن چيخان شئيلر اصيل ديرينه ساتيلسا ايدي اون بئله تورکييه ني آباد ائتمک اولاردي. اوغرولار بورا دولوشوب. تورپاق آلتيندان چيخان قييمتلي آنتيک شئيلري اوغورلاييب خاريجي اؤلکه لره آپاريرلار. بو شئيلرين بعضيسيني اؤزلري قازيب چيخارير، بعضيلريني ده کندليلردن آليرلار. آمئريکالي يئنه اونون سؤزونو تصديق ائتدي. کندلي سؤزونه داوام ائده رک: - داها، - دئدي، - تورپاغين آلتيندا چيخارماغا بير زهريمار دا قالماييب. اجنبيلر ايندي نه اوغورلاييرسا، اونو حؤکومتدن اوغورلاييرلار. من: - بس کندليلر ايندي نه ايله دولانيرلار؟ - دئيه سوروشدوم. - هئچ اونو سوروشما… بورالاردا آلتي کند وار. ائولرينه گئتسن، چير-چيلپاق. هئچ بير شئي گؤره بيلمزسن. نه سو قابي، نه سهنگ، نه چاناق قالميشدير. - نه اوچون بئله؟ - اونا گؤره کي، هر شئيي بو توريستلره ساتيرلار. ائولرده قييمتلي بير شئي قالماميشدير. هر نه وارسا آديني آنتيک شئي قويوب ساتيرلار. آداملار يامان کورلانيب. دونن، ال بويدا بير اوشاق منيم ائششگيمين بوينونداکي مونجوقلاري اوغورلاييب. او، بونلاري آپاريب اول تورپاغا باسديراجاق، سونرا دا اورادان چيخارديب آنتيک شئيدير - دئيه ساتاجاق. ائولرده کي گلينليک قيزلار دا بيجلشيبلر. اللرينه کئچن هر داشي مهارتله اووور، اونلارا جوربجور شکيللر وئريب ساتيرلار. اونلار ائششک ناليندان مئداللار، کؤهنه پوللار قاييرماغي دا باجاريرلار. آمئريکالي يئنه باشقا اؤلکه لرده ده بئله ائتديکلريني تصديق ائله دي. من قوجا کندليدن: - بس سن نه ايله دولانيرسان؟ - دئيه سوروشدوم. - من ائششک چوودارييام - دئدي. او بونو دئييب قويودان سو چکدي و ائششگيه وئردي. ائششک سو ايچرکن آمئريکالي بيردن يئريندن سيچراييب ائششگين يانينا گئتدي. من ايسه کندلي ايله صؤحبتيمي داوام ائتديرديم. - ائششک آليب-ساتماقلا کئچينه بيلرسنمي؟ - شوکور آللاها… بئش ايلدير بو ايشله دولانيرام. - مثلا، نه قدر قازانيرسان؟ - بو آليب-ساتديغيم ائششکدن آسيليدير. - بير ائششگي نه قدر واختا ساتا بيلرسن؟ - بونو دا بيلمک اولماز. بعضاً اوچ آي، بئش آي بير ائششک ساتيلمير، بعضاً ده گؤرورسن بير گونده بئش ائششک ساتميسان... آمئريکالي يانيما قاييتدي. چوخ هيجانلي ايدي. - ائششگين اوستونده بير خالي پارچاسي وار، گؤرموسنمي؟ او، اينگيليسجه دانيشديغي اوچون کندلي اونو باشا دوشموردو. من باخديم. ائششگين داليندا چوخ کؤهنه، پالچيقلي بير چول واردي. - سن بو چيرکلي جينديري دئييرسن؟ - سن نه دانيشيرسان؟ بو بير خاريقه، بير شاه اثردير. سيز کندلي ايله صؤحبت ائدنده من خاليني ديقتله گؤزدن کئچيرديم. اونون رنگي ده ايشي کيمي چوخ قييمتليدير. هر سانتيمئترينده دوز يوز ايلمک وار. دونيادا بونا بنزر بير شئي گؤرونمه ييب. اونو آلماق ايسته ييرسن؟ - البتته! آما کندلي اونو آلاجاغيمي بيلمه مه ليدير، من بونلاري ياخشي تانيييرام. بير شئييني آلماق ايسته سن، آنتيک شئي حساب ائديب اوستونه دونيانين قييمتيني قوياجاقلار. نه قدر پول وئرسن گؤزلري دويماز. اونا گؤره ائله ائدک کي، او اصيل مقصديميزي باشا دوشمه سين. کندلي بيزه باخيب: - بو کافير نه قيريلدادير؟ - دئيه سوروشدو. - هئچ، - دئديم، - بو يئرلردن خوشو گلديگيني دئيير. - بورادا خوشا گلن نه وار کي؟ چيلپاق کيرجلي تپه لردير. آمئريکالي منه: - سيزه آنتيک شئيلري اوجوز آلا بيلديگيمي دئميشديم. ايندي باخ، يئنه بو فنديمي ايشه سالاجاغام. - نئجه ائده جکسينيز؟ - خالي نين آديني بئله چکميه جک، ائششگي آلاجاغام. کندلي، چوخ احتيمال کي، خالي نين قييمتيني بيلمه ديگيم اوچون کؤهنه چولو دا ائششگين اوستونده بيزه وئره جک. سيز ايندي اونا منيم بو ائششگي آلماق ايسته ديگيمي سؤيله يين! من کندليدن: - سن بو ائششگي ساتيرسانمي؟ - دئيه سوروشدوم. - هه… ساتماق ايسته ييرم... - اونو نئچه يه ساتماق فيکرينده سن؟ - او باخير آليجيسينا! - بيز آلماق ايسته سک… او گولدو: - منيمله ظارافات ائديرسينيز؟ سيزين کيمي بير بَيين ائششک نيينه لازيمدير؟ - سن اونون فيکريني چکم… بيز اونو آلماق ايسته ييريک. نئچه يه وئريرسن؟ - دئديم کي، او باخير آليجيسينا… سن آلاجاقسان يوخسا بو کافير؟ - او آلاجاق... - او نه ميلتدندير؟ - آمئريکالي... - هه… اؤزگه دئييلميش… اؤزوموزنکي ساييلير. جانيم بو چوخ قارت شئيدير، دئ کي، بونو آلماق اونا ال وئرمز. مسله ني آمئريکالييا دئديم. - لاپ ياخشي - دئدي، - دئمه لي او ائششگي اوجوز وئره جک. من کندلييه : - ائششک قارت دا اولسا، راضيدير - دئديم. - اشي، بيزيمچين عاييب اولار. سونرا اؤلکه سينه گئديب «تورکلر مني آلداتدي» - دئير. بونو دا آمئريکالييا دئديم. - تورک کندليسي چوخ صاف، ان دوزگون آداملاردير - دئدي. باشقا يئرلرده اولسايدي درحال ساتماغا تلسرديلر. ايندي کي او، بو قدر تميز قلبلي آدامدير، من ده ائششگي باها قييمته آلاجاغام. کندلييه: - آمئريکالي راضيدير، - دئديم. - ياخشي. آما بو ائششک آمئريکايا چاتماميش يولدا اؤله بيلر. هر يئريني قوتور باسيب. - سنه نه جانيم. او بئله ده اولسا، آلماق ايسته يير. - آي جانيم، بو قوتور ائششک اونون نيينه لازيمدير. - سنين نيينه گرک؟ - ماراقلانيرام، - دئدي. - بيرجه بو آمئريکالي جنابدان سوروش، مگر اونون اؤلکه سينده هئچ ائششک يوخدور؟ بونو آمئريکاليدان سوروشدوم. - اونا دئيين کي، وار. آما بئله سي يوخدور. - دئمه لي بئله… آمئريکان ائششگي اونون خوشونا گلمير، تورکيه ائششکلريني داها چوخ خوشلايير. - ائه، داها نه ائتمک اولار. بابالي اؤز بوينونا. من ائششکده اولان بوتون نؤقصانلاري سادالاديم. ايندي بير قوتور ائششک اوچون داها بير اجنبي قوناغيميزين خطريني يئره سالماياق. ساتاق دئييرم. - نئچه يه؟ - سيزين اوچون اون مين ليره يه وئره بيلرم. - نه؟ جانيم دلي-زاد اولماميسان؟ ان تميزقانلي عرب آتيني ايکي-اوچ مين ليره يه وئريرلر. - ائله ايسه ائششک اونون نيينه لازيمدير، ائله بير عرب آتي آلسين دا... اونون نه قدر ايسته ديگيني آمئريکالييا دئديم. - من اونلارين خاصيتيني بيليرم - دئدي. - بودور، گؤردون؟ ائششک اوچون اون مين ليره ايسته ين، يقين کي، خالي اوچون يوز مين ليره ايستر. ايندي من بو ائششگيه اون مين ليره وئررم. آما بونو ائشيدن کيمي يگيرمي مين ايستيه جک. اونو وئرمه لي اولسان اللي مين ايستيه جک. اونا گؤره ده ياخشي سؤوده لشمک لازيمدير... کندلييه: - سن دوزونو سؤيله، - دئديم - بو ائششگي نئچه يه آلميسان؟ - ديليمه يالان گلمز. اؤزوم ده دستمازلييام، يالان دئيه بيلمرم. من بو ائششگي دريسيندن چاريقليق چيخارتماق اوچون بئش ليره يه آلديم. بو گون ده اولماسا صاباح اؤله جک. او، باشقا ايشه ده ياراماز. - آ کيشي، اينصافين اولسون. بئش ليره يه آلديغين بو حئيواني بس نه اوچون اون مين ليره يه ساتماق ايسته ييرسن؟ - جانيم بيز اونو ساتماق فيکرينده دئييليک. سيز اؤزونوز آلماق ايسته ييرسينيز… قارت دئديم، قوتور دئديم. صاباحا چيخماز دئديم… آليرام دئيير… هه، آز قالا ياديمدان چيخميشدي. بو اوسته ليک بير ده توپالدير. دال آياغيني چکير... - ضرري يوخدور. - گؤرورسنمي؟ دئمه لي بئله چيخير کي، بونون نه ايسه بير قييمتي، بير کرامتي وار. ائله دئييلسه، بو آمئريکالي کافيره نه دوشوب کي، بئله قوتور، قارت، توپال ائرکک بير ائششگي آلسين. ائله دئييلمي؟ اون مين! هئچ جور آشاغي اولماز. من آمئريکالييا: آشاغي دوشمور - دئديم. - اون مين وئرک؟ نه ائدک؟ اون مين ليره ني وئرسک او زامان يگيرمي مين ليره ايستيه جک... قييمت اوستونده دوز ايکي ساعات سؤوده لشديک. آرادا بير فيکريميزدن ال چکميش کيمي گؤرونوب يولا دوشدوک. قوجا بونو هئچ وئجينه آلمادي. قاييديب يانينا گلديک، - قاييديب گله جگينيزي بيليرديم. - ندن بيليردين؟ - بونو بيلمه يه نه وار کي؟ الينيزه بئله اوجوز بير ائششک دوشوب. اونو الدن قاچيرماياجاقدينيز کي؟ شوفئره ماشيني سوروب، ايره ليده، يول اوستونده بيزي گؤزله مه سيني تاپشيرديم. بيز ائششگي آلاندان اوندا اورايا گئده جک و ائششگي اورادا قويوب يولا دوشه جکديک. نه ايسه، افنديم، خئيلي بوغاز دؤيمه دن سونرا بيز ايکي مين بئش يوز ليره يه راضيلاشديق. پولو اووجونا سايديق. کندلي بوندان سونرا ائششگين چولونو گؤتوردو و نوختاسيني وئردي اليميزه: - آللاه خئيير وئرسين! - دئدي. سونرا دا علاوه ائتدي: - بيزيم بو قوتور قارت ائششک هاوايي ساتيلدي… نه ايسه… خئيير آپاراسينيز... آمئريکالي نين گؤزلري برَلميشدي. او، کندلي نين الينده کي چولا باخيردي. ايندي نه اولاجاقدي؟ آمئريکالي منه: - قوي دويوق دوشمه سين، - دئدي. - ائششگي چکه-چکه بير آز گئدک و مسله يه اهميت وئرميرميش کيمي قاييديب، «ائششگين بئلي اوشوير، چولو وئر اوستونه آتاق» دئيک. ائله ائدريک کي، او، خالي پارچاسيني ايسته ديگيميزي باشا دوشمه سين... ائششگين نوختاسيندان توتوب يولا دوشدوک. ائششک چوخ چتينليکله يئريييردي. آمئريکالي آرخادان ايتله يير، من نوختاسيني چکيرديم. ائششک گئتديکجه آياغيني يئره داها چوخ ديره يير بيز طاقتدن دوشوردوک. خاليني کندلي نين اليندن قوپارا بيلسک ائششگي درحال بوراخيب سوووشاجاقديق. گوج-بلا ايله يگيرمي-اوتوز آدديم گئتميشديک کي، کندلي آرخادان: - دايانين، - دئيه بيزي سسله دي - ائششگين زادي قالميشدير... بيز چوخ سئوينديک. گومان ائتديک کي، بو ساعات چولو گتيره جک. او، يويوره-يويوره گلدي. - ائششگين پاياسيني ياددان چيخارميسينيز. آمئريکادا اونون باشيني نه يه باغلاياجاقسينيز؟ هئچ پاياسيز دا ائششک ساخلارلارمي؟ ناشي اولماغينيز ائله بوندان بيليندي. آمئريکالي: - فورصتدير، - دئدي. - خالي پارچاسيني ايسته. دئ، بو کؤهنه چولو دا وئرسين. من کندلييه: - ائششک ضعيف و خسته دير، - دئديم - اوشويه جک. سن اونون اوستونه بير چول سالميشدين. اونو دا وئر اوستونه آتاق. - يوووخ! اونو وئرمرم. سيز مندن ائششگي آلميسينيز، چولو يوخ. - دوزدور، ائششگي آلميشيق. آما او کؤهنه بير قپييه ديمه ين جيندير پارچاسيني دا وئر اوستونه سالاق. - کؤهنه اولماغينا کؤهنه دير، پولا دا گئتمز. آما وئرمه رم. - نه اوچون؟ - او، منيم آتامدان ياديگار قالميش بير چولدور. دده-بابادان خاطيره دير، وئره بيلمرم، جناب! بونو آمئريکالييا دئديم: - سوروش گؤرک بو چيرکلي جيندير اونون نيينه يارايار؟ بونو دا کندلييه دئديم. - نييمه يارايار نه دئمکدير؟ باشقا بير ائششک آليب اونون بئليني اؤرته جگم. قيسمت اولارسا، بير سيزين کيميسيني تاپيب، آللاهين ايزينييله اونا ساتاجاغام. بو خالي پارچاسي اوغورلودور. گؤردونوز پاياني سيزه هاوايي وئرديم. هئچ پول ايسته ديم؟ - آ جانيم، بير نئچه قوروش دا چول اوچون وئرک؟ ائششک يازيقدير، اوستونه اؤرتريک. - آي دئدين ها! سونرا بو ائششکلري نئجه ساتاجاغام. بئش ايلدير قارت و قوتور ائششکلري آليب بو چولون سايه سينده ساتيرام. هايدي، خوش گلدينيز… مالين خئيريني گؤرون! آمئريکالي نين قاني داها دا قارالير دئيه بو سؤزلري اونا دئمه ييب قولونا گيرديم. کندلي بير نئچه آدديم اوزاقلاشديقدان سونرا: - ائششگي بوراخيب گئده جگينيزي بيليرم - دئدي. - اونا گؤره اوزاغا آپارمايين. يوخسا يورولارام. ائششگي ائله اوراداجا بوراخيب ماشينا طرف گئتديک. آمئريکالي خالي موتخصيصي: - باشقا يئرلرده، باخ، بئله سي يوخ ايدي - دئدي. - هئچ يئرده باشيما بو ايش گلمه ميشدي. باشقا ايشلر اولموشدو. آما بئله سي اولماميشدي. ماشينا مينديک. پايا هله ده الينده ايدي. من: - بونو نه ائده جکسن؟ - دئيه سوروشدوم. - بونو بو يئرلرين خاطيره سي اولاراق خالي کوللئکسيياما قوياجاغام. قييمتلي شئي کيمي. ظارافات دئييل، بو بيزه ايکي مين بئش يوز ليره يه اوتوردو. چوخ اوجوز آلديق... - گؤرورسنمي، بوتون عالمده بي آبير اولدوق، بي آبير… او، باشيني قاپازلايا-قاپازلايا بو سؤزلري بير نئچه دفعه تکرار ائتدي... كؤچورن : عباس ائلچين قايناق : آزادليق راديوسو
|
||
|
+
: پنجشنبه ۱۳۸۹/۱۰/۰۹ساعات 21:41 يازان : عباس ائلچین
|
|
||
|
|
XOŞ GƏLDİNİZ |
|
|
||
|
|
|
|
|
باش صحيفه |Baş səhifə پوستا |Posta آرشيو | Arşiv باشليقلار | Başlıqlar |
||
|
|
دوست وئبلاقلار | dost bloglar |
|
|
ائلچین کتاب ائلچین کئفلی اسکندر تونقال دوکتور جئری سهلان(قدرت ابوالحسني) |
||
|
|
|
|
|
POWERED BY
BLOGFA.COM |
||