بیر آدام لازیم‌دیر

جلیل محمدقولوزاده

روسیه‌ده و اوروپادا نشر اولونان قزئته‌لر ها یازیرلار کی، موسلمان‌لار چالیشیرلار  "‌ایتّیحادی-موسلیمین "-(ی) دوزلدیب بیرلشسینلر و اجنبی میلّت‌لره زور ائدیب، بوتون یئر اوزونه صاحیب اولسونلار. 

  بیر آدام لازیم‌دی کی، گئده یاپیشا بو قزئت‌لری یازان‌لارین الیندن و گتیره قاراباغا و قاراباغین بیر پارا واعیظ‌لرینی نیشان وئره؛ هامان واعیظ‌لری کی، جاماعاتی یئتمیش ایکی تیره‌یه بؤلمکدن ساوایی اؤزگه بیر ایشلری یوخدو.    

  بیر بئله آدام بیزه لازیم‌دی. 

    بوندان ساوایی بیزه بیر آدام دا لازیم‌دیر: بیر آدام دا لازیم‌دی گئدیب دورسون آرازین کناریندا و ایراندان بو طرفه کئچن بعضی واعیظ و مرثیه خوان‌لارا و تزه سئییدلره دئسین: من اؤلوم، اولگوج‌لری قویون بورادا، سونرا آرازی کئچین.    

بیر بئله آدام بیزه لازیم‌دی.      

  بوندان ساوایی بیر آدام دا بیزه لازیم دی:   

  آغدام‌دا حاجی قنبرولی جومعه گونلری دوکانی آچیر کی، گویا تویوغو گلیب دوکاندا یومورتدایاندان سونرا دوکانینی باغلاسین. بو حیله  ایله حاجی فورصت تاپیب آلیش-وئریش ائله‌ییر. بیر آدام لازیم‌دی کی، آغداما گئدیب حاجی قنبرولی‌دن سوروشا:  "‌آی حاجی، آللاه آتانا رحمت ائله‌سین، نئجه حئیفین گلمه‌دی او پول‌لارا کی، آپاریب عربیستان بییابانیندا بدؤوی‌لره پایلادین؟ " .     

  بیر بئله آدام بیزه لازیم‌دی.   

  سونرا بیر آدام دا بیزه لازیم‌دی. 

  تیفلیسده روحانی رئیس‌لریمیز گیمنازییادا اوخویان شیعه مذهب موسلمان اوشاق‌لارینا دئییرلر کی، سیز سوننی موللاسیندان درس آلمایین. بیر آدام لازیم‌دی کی، گئدیب همین روحانی رئیس‌لریمیزه دئسین:  " آی قارداش، نه واخت سیز بختی‌قاره موسلمان‌لارین ایچیندن ردّ اولاجاقسینیز؟ "     

  بو آدام‌لاردان ساوایی بیر آدام دا بیزه لازیم‌دی، بو دا قالسین سونرایا. 

     هردم‌خیال. 

     "ملا نصرالدین " ،  3 نوامبر،  1906،  ن 31. 

کؤچورن: عباس ائلچین