اؤلو توتماق 

 علي نظمي (1946-1878) 

      موللا عمي! بيز موسلمانلار نه قدر کي، ديريليگيميزده مرديم‌آزار اولوروق، ايکي او قدر ده اؤلندن سونرا مرديم‌آزار اولوروق. سندن ده عاييب اولماسين، منيم بير بالاجا اوغلوم وار، سنين نؤکرين. نئچه گوندور برک ناخوش ايدي. نه قدر داوا-درمان ائله‌ديکسه، ياخشي اولمادي. آخير بو نئچه گونلرده آتاسينا آللاه رحمت ائله‌ميش منيم بيبيم گلدي بيزه چيخدي. اوغلومو ناخوش گؤروب، آنامدان سوال ائله‌دي کي، آي قيز ملک‌نيسه، بو اوشاغين آزري ندير؟ 

  آنام دئدي آي خانباجي، واللاه بيلميرم. بيبيم دئدي آي قيز، باخيرام اوشاغين گؤزلري ساراليب، کيرپيکلري قوش-قوش اولوب و باشي‌نين توکلري بيز-بيزدير. يقين اوشاغين بير آيري آزاري يوخدور، آنجاق اوشاغي اؤلو توتوب! يا رحمتليک باباسي، يا ننه‌سي، يا دا بيزيم رحمتليک بديرجاهان باجيم توتوبدور. دور بونو آپار قيزخانيم باجي نين يانينا، بير ايي فالينا باخدير. هر کس، يا هانسي اؤلو توتموش اولسا، بيلسين و دئسين گؤرک اؤلو نه ايسته‌ييبدير. آنام دا گئديب قيزخانيم باجيني گتيرديب ائويميزه اوشاغين يانينا. قيزخانيم خالا الينه بير ايي آليب و بير الک قاباغينا قويدو و الگين اوستونه ايکي پارچا چؤرک و ايکي قيريخ کؤمور قويدو و ایگی بير نازيک ساپ ايله توتدو الگين اوسته اورتاسيندا... و دوداغي‌نين آلتيندا باشلادي ميريلداماغا. اون دقيقه‌دن سونرا ايگي يئره قويوب اوزونو توتدو بيبيمه و دئدي: آي قيز، اوشاغي رحمتليک بديرجاهان باجين توتوبدور. و اؤزو ده يوخا ايله حالوا ايسته‌ييبدير. تئز اولون بير قازان حالوا بيشيريب پايلايين يئددي ائولي قونشويا، يوخسا اوشاق ايکي گونه کيمي قالماز، اؤلر! 

    موللا عمي، همان ساعت آنام ديرندي اوستومه 4 گيرونکه ياغ، 20 گيرونکه اون، 6 گيرونکه شکر، 2 ميثقال زعفران مندنجه آلدي و همان ساعت بيشيريب پايلادي يئددي ائولي قونشويا و قالانين دا اؤزلري آلاباختا پاليد اودان کيمي بيياخ اوددولار. ايندي اوشاق ياخشيدير آللاه بيبيمين ده و قيزخانيم خالانين دا آتالارينا رحمت ائله‌سين، يوخسا اوشاق اؤلوب گئتميشدي! بوندان سونرا من بئله-بئله ايشلره شکّ ائله‌مه‌يه‌جگم. هه... اونو دئييرديم کي، موسلمانين اؤلوسونو ديريسيندن مرديم آزار اولور، مني گئنه بئش-اون مانات خرجه سالدي.   

  کند خرجينيز مشدي سيژيمقولو 

  " موللا نصرالدين " ، 1907، نؤمره 27.

کؤچورن: عباس ائلچین